Bakwethu!
Ngiyabonga ngokungibikela ngesimo esesivele enxiweni lakwethu kwaBhanya.
Eminyakeni emibili edlule, sihlanganiswe yisililo ngokushiywa kwethu nguMdu [26.11.2015], ngavuka ekuseni ngayokhuleka engcwabeni likaGogo, uHluphekile uKaMhlungu wakwaZungu, umphembi walesi siza esazalelwa sakhulela kuso thina zelamani zikaMaZungu noNtabayezulu, esaze sachithwa saxoshwa khona ngowe-1963.
Emizukuzukwini yeminyaka size sithole inkululeko ngokufika kombuso wentando yeningi [1994] inxiwa lakwethu lase laba yingxenye yeplazi leBhunu, esabesingasakwazi nokuyosondela ngisho nasemangcwabeni akwethu asala khona.
Ekuvakasheni kwethu kokuqala emva kwalokho [1996] saphelekezelana noMama nabafowethu nodadewethu kanye noUbbo, sayokhumbuzana, sikhombisana amanxiwa namaliba akwethu, ngase ngixhumana nabameli abangihlanganisa neBhunu leli nxiwa lakwethu elaselikade lanikwa lona emva kokwephucwa kwethu [1963], sasayina kubameli isivumelwano selungelo lokulithenga-ke manje inxiwa lakwethu. …
Kusukela lapho-ke – njengoba nazi – sekukaningi sidamane siphuma nabantwana nabazukulu nezihlobo nabangani abaqhamuka neno naphesheya, siyozihlanganela emabaleni akwethu kwaBhanya, sibuse, sithokozele ukubona les izikhathi zombuso wentando yeningi kwelakithi okhokho bethu abawuzabalazela kanzima kangaka – sihlabelele sithi „Lihle leli zwe, osiphé lona!“ … …
Asethembe ukuthi nangomuso amanxiwa namaliba akwethu ayohlala eyisikhumbuzo nenkuthazo kubo bonke abedlula khona.
Siyakhonza!
Yithi eKhaya eJalimane
>> iziThombe zethu | unser Fotoalbum
[…] Abomndeni nezihlobo sebengawuthola bazifundele lo mlando wakwethu >> eKhaya […]
[…] noMvikeli lona Owasophula nasolakeni lwabacindezeli Wasihlwitha nakosondonzima bogandaganda babo sebesemabaleni kwaBhanya Wasichushisa, sasinda Wasiweza ngelibanzi, sasukuma sacathulisana Sakha kabusha, sahluma, […]
[…] ngizoqhuba ngaso nami: Wonke umzukulu wami oyintombazane, ngimetha elidumisa uninakhulu, uMaZungu osizalayo – ngimetha ngithi unguNdindi = Catherine; wonke umzukulu wami ongumfana, ngimetha elidumisa […]